點解可以聞到柏金森病？
大家都可能記得十年前曾經有新聞報導有位蘇格蘭女士Joy Milne嗅覺特別敏感，可以聞得出柏金森病。 佢喺先生柏金森病都未有任何症狀時候，就已經話佢身上有陣怪味。起初大家都唔信，但經過多次測試後，醫生終於接受佢就係有咁天份，可以憑嗅覺診斷到柏金森病。
如果止係咁，就不過係有趣八卦新聞。
還好科學家醒目，循住呢個發現，開始研究柏金森病體味點解唔同，以及可否利用來做診斷，尤其係提前診斷。經過十年努力後，研究終於開始開花結果。首先，佢哋訓練到隻狗可以聞出柏金森病。
柏金森病人身體有陣特別味道係因為佢哋皮膚增加生產油質皮脂。長者皮膚乾燥係因為減少分泌皮脂。但柏金森病友就相反，會增加，而且更重要係皮脂成分組合有改變。因為咁所以會發出有别常人嘅體味。
研究人員最近報導用紗布從無病者，柏金森病友，同快速動眼期睡眠行為障礙症病友嘅背脊取得皮脂樣本。分析顯示三組人皮脂唔同，而快速動眼期睡眠行為障礙症病友皮脂內可揮發成分就介乎常人及柏金森病友中間。快速動眼期睡眠行為障礙症病友喺瞓覺到快速動眼期時，唔似常人會靜止放鬆四肢，反而會猛郁動，揮手踢腳。佢哋日後往往會呈現柏金森病症狀。
Milne女士幫手聞呢啲紗布。佢不單止成功聞出所有柏金森病友，並且覺得六名快速動眼期睡眠行為障礙症病友皮脂氣味古怪。其中三名佢認為係柏金森病友，後來果然已有兩人出現咗柏金森病症狀。
柏金森病友皮脂變化亦會隨患病日子耐而加深變異。但就唔受藥物影響。
從此可見，皮脂分析極可能可以為提前診斷到柏金森病。因此，對防範柏金森病嘅藥物，同及早阻止惡化都應該會有幫助。
Walton-Doyle C, Heim B, Sinclair E, Lim SH, Hollywood KA, Milne J, Holzknecht E, Stefani A, Högl B, Seppi K, Silverdale M, Poewe W, Barran P, Trivedi DK. Classification of Parkinson’s disease and isolated REM sleep behaviour disorder: delineating progression markers from the sebum volatilome. NPJ Parkinsons Dis. 2025 Jul 15;11(1):202. doi: 10.1038/
關於作者：黃震遐醫生
黃震遐醫生係腦神經科醫生、香港大學校友及粵文作者，長年以廣東話深入淺出講解腦神經、認知障礙、藥物安全同健康研究，推廣市民用母語接觸可靠醫學知識。
作者理念：「上醫治未病，中醫治欲病，下醫治已病。」
原文來源與授權
本文經黃震遐醫生授權，由 Konghub 整理及轉載。查看 Facebook 原帖。
醫療免責聲明
本文只供健康教育及一般參考，唔構成個人醫療診斷或治療建議。如有症狀或用藥疑問，請向合資格醫護人員查詢。