照顧腦癎症病友，留意精神健康一樣緊要。
最近又有一篇報告檢討腦癎症同其他精神健康問題嘅關聯。同以前同類性質分析一樣，發現不少腦癎症朋友都同時受到精神病疾困擾。有啲似抑鬱、自殺傾向、過度焦慮、創傷後遺症，明顯可以係因為久病不癒造成壓力而起。
但有啲就係因為共同病理基因原因，注意力不足過度活躍症、強迫症、自閉症就屬呢一類。
有的啲就可能係多種原因造成互為因果，例如腦癎症及思覺失調。
亦有啲可以係多種原因造成，例如遺傳性腦癎症女性懷孕期用咗丙戊酸，所生仔女就唔止係腦癎症風險增高，連注意力不足過度活躍症風險都多咗。
無論如何，病友自己及家人、醫療工作者，都應該打醒十二分精神留意腦癎症外，重有冇其他精神困難，需要協助照顧。唔好以為淨係睇實有冇腦癎發作就夠。
輕度成年人嘅注意力不足過動症、自閉症都唔容易診斷，往往冇得到應有嘅應對照顧。但唔止係會影響病友生活質素，亦會干擾佢同親友同事嘅關係。
腦癎未得充足控制，更應該留意病友有冇抑鬱、自殺傾向、過度焦慮、創傷後遺症需要應付。香港先進於其他華人地區，將病名從癲癇症改為腦癎症就係正視腦癎症病友精神照顧嘅一個里程碑。但呢個唔足夠。我哋應該再向進行多幾步。解決埋其他仍未得重視嘅困擾。
Kwon C, Rafati A, Ottman R, et al. Psychiatric Comorbidities in Persons With Epilepsy Compared With Persons Without Epilepsy: A Systematic Review and Meta-Analysis. JAMA Neurol. Published online November 25, 2024. doi:10.1001/jamaneurol.2024.3976
關於作者：黃震遐醫生
黃震遐醫生係腦神經科醫生、香港大學校友及粵文作者，長年以廣東話深入淺出講解腦神經、認知障礙、藥物安全同健康研究，推廣市民用母語接觸可靠醫學知識。
作者理念：「上醫治未病，中醫治欲病，下醫治已病。」
原文：黃震遐醫生 Facebook（原發佈日期：2024年11月26日）。本文經作者授權由 Konghub 整理轉載，保留粵文原意及醫學文獻資料。
醫學資訊只供公眾教育，唔代替個人診斷或治療建議；如有症狀或用藥疑問，請向合資格醫護人員查詢。
