李太有三高，血壓、血糖、血脂都高，又有冠心病。醫生開咗隻藥幫佢降低膽固醇。點知食咗唔耐，就覺得雙腿酸痛、用唔到力。停咗隻藥，腳就唔痛，但膽固醇就守住高位唔落，令李太深感後有追兵，前無去路，十分煩惱。
眾所周知，低密度膽固醇過多，血管壁內會出現一坺坺軟黃凸凹，望落似粥煲桀後米粒黐埋一嚿嚿嘅血管粥樣硬化斑塊。冠心病、缺血性中風會因此而增加。
通常，醫生會畀病友服用他汀類藥物，來降低低密度膽固醇。但少部分朋友頂唔住他汀類藥物副作用，肌肉痠痛到無法使用，或只可以服用極低劑量嘅藥。喺呢種情形下，只可以轉用注射藥物PCSK9抑制劑，但價錢就相對昂貴好多。
還好，又有一名救駕藥物報到。
Bempedoic acid (中文名似乎仍然意見紛紜) 其實先前已經用咗幾年。但只係副將，用來幫助使用他汀類藥物但仍未能降低膽固醇至目標水平者。前兩日率先電子出版嘅報告就表示Bempedoic acid 有資格坐正，擔大旗。研究人員隨機將一萬四千名不能夠忍用足夠他汀類藥物劑量嘅心腦血管病高危病友分為單獨試用Bempedoic acid，或無效用嘅佯裝藥丸。跟進五年後發覺Bempedoic acid唔只係可以降低膽固醇，而且更緊要係可以有效減少冠心病發作23%、減少通血管手術19%。安全方面，除咗令尿酸上升、痛風及膽石增多，就冇其他重要副作用。唯一美中不足係，Bempedoic acid對預防中風、或減少血管性死亡就未見有用。
他汀類藥物，由於使用歷史已久，及有效，應該仍係首選降膽固醇藥，但對冇法或心理上怕使用他汀類藥物嘅心血管病朋友，Bempedoic acid就應該係值得考慮。
Steven E. Nissen et al, Bempedoic Acid and Cardiovascular Outcomes in Statin-Intolerant Patients, New England Journal of Medicine (2023). DOI: 10.1056/NEJMoa2215024
關於作者：黃震遐醫生
黃震遐醫生係腦神經科醫生、香港大學校友及粵文作者，長年以廣東話深入淺出講解腦神經、認知障礙、藥物安全同健康研究，推廣市民用母語接觸可靠醫學知識。
作者理念：「上醫治未病，中醫治欲病，下醫治已病。」
原文：黃震遐醫生 Facebook（原發佈日期：2023年3月10日）。本文經作者授權由 Konghub 整理轉載，保留粵文原意及醫學文獻資料。
醫學資訊只供公眾教育，唔代替個人診斷或治療建議；如有症狀或用藥疑問，請向合資格醫護人員查詢。