十九歲都可以患阿兹海默型認知障礙症？
北京首都醫科大學最近報導一名十九歲男仔，兩年來記性愈來愈差，卒之做咗檢查，發覺記憶確實不正常。正子腦掃描顯示佢大腦處理記憶嘅區域都有問題，兩邊海馬區萎縮，而左右兩邊顳葉就新陳代謝活動減少。如果係阿兹海默症，正子掃描通常會見到腦神經細胞積累β澱粉樣蛋白，而神經細胞伸延出來嘅纖維就積累Tau蛋白. 但係佢就唔見。雖然咁，佢腦脊液裏面另一個阿兹海默症標誌物，磷酸化tau181蛋白就高咗。
阿兹海默型認知障礙症一般見於老年，以前，最後生嘅患者係21歲，所有三十歲以下患阿兹海默型認知障礙症嘅都係因為有基因異常而得病。目前知道嘅有三種，都係同形成β澱粉樣蛋白過程嘅上流化學物有關。但呢位男仔驗來驗去，都搵唔到任何基因異常！
所以雖然醫生排除哂甚他病後只好診斷佢可能係目前最後生嘅阿兹海默型認知障礙症，由於解釋唔到點解，就只好等日後發展同檢查來揭盅解謎。
jia, Jianping et al. ‘A 19-Year-Old Adolescent with Probable Alzheimer’s Disease’. 1 Jan. 2023 : 915 – 922.
關於作者：黃震遐醫生
黃震遐醫生係腦神經科醫生、香港大學校友及粵文作者，長年以廣東話深入淺出講解腦神經、認知障礙、藥物安全同健康研究，推廣市民用母語接觸可靠醫學知識。
作者理念：「上醫治未病，中醫治欲病，下醫治已病。」
原文來源與授權
本文經黃震遐醫生授權，由 Konghub 整理及轉載。查看 Facebook 原帖。
醫療免責聲明
本文只供健康教育及一般參考，唔構成個人醫療診斷或治療建議。如有症狀或用藥疑問，請向合資格醫護人員查詢。