擦牙唔係只係為咗唔想剝牙
日本研究人員最近進一步確定牙周病會增加心房纖顫風險。
心房纖顫係人到中年後嘅常見問題。心有事，自然會增加心肌梗塞同心力衰竭風險。但從腦科角度睇，一樣緊要。事關有心房纖顫，栓塞性中風、認知障礙症風險都會大幅增加。
華人比白種人風險較低，中年後，大概有一成機會患上心房纖顫，而白人就冇咁好彩，風險可以高達25%。但大家當然唔可以依住流行病學數字就以為可以火燒到眉頭始需要理。最好係早早預防。
醫學界早都知道，一般心腦血管風險因素，高血壓、高膽固醇、糖尿病、吸煙、飲酒、少運動、以及睡眠窒息都可以引起心房纖顫。
而近年來更加注意到原來牙周病都係隱形殺手，可以增加心房纖顫風險三成咁多。
但點解會呢？
原來，口腔內有種細菌叫牙齦卟啉單胞菌 (Porphyromonas gingivalis)。呢種細胞同牙周病關係密切。之前呢種細胞嘅DNA已經被發覺去到心、腦、肝、胎盤等組織，說明佢真係可以經血液流傳，侵入人體其他器官。
研究人員最近做咗試驗，小鼠分成兩組，一組牙肉注入呢種細胞。十二星期時，兩組小鼠心臟都冇差别。但去到十八星期後，牙肉有注射入細菌嘅小鼠，心房出現纖顫風險居然高咗六倍！唔止咁，呢啲倒楣嘅小鼠有牙周病，心房有纖維化疤痕，及牙齦卟啉單胞菌。
研究人員另外亦喺69名心房纖顫病友心臟內搵到牙齦卟啉單胞菌。而牙周病愈嚴重，就心臟內細菌愈多。
一日擦兩次牙及用牙線，就可以減少中風同認知障礙症風險，再次提醒大家，不要因小失大！
"Shunsuke Miyauchi et al, Atrial Translocation of Porphyromonas gingivalis Exacerbates Atrial Fibrosis and Atrial Fibrillation, Circulation (2025). DOI: 10.1161/CIRCULATIONAHA.124.071310"
關於作者：黃震遐醫生
黃震遐醫生係腦神經科醫生、香港大學校友及粵文作者，長年以廣東話深入淺出講解腦神經、認知障礙、藥物安全同健康研究，推廣市民用母語接觸可靠醫學知識。
作者理念：「上醫治未病，中醫治欲病，下醫治已病。」
原文來源：黃震遐醫生 Facebook 原文（May 10, 2025）
本文經作者授權由 Konghub 整理轉載，保留粵文原意及醫學文獻資料。
醫療聲明：醫學資訊只供公眾教育，唔代替個人診斷或治療建議；如有症狀或用藥疑問，請向合資格醫護人員查詢。