使乜睇醫生？同AI傾偈就𠶧？
近年來，AI 成大熱門話題，好多人都有讚冇彈，當造AI系統半個神仙。十多年來，行醫耐唔耐就會撞到位朋友質疑，谷歌上話咁，點解你話咁？不過，上網尋找答案，始終都可能花多亂眼，遠不及AI會似乎權威一名，畀個清楚答案。而近期研究證明AI機考醫生專業試往往高分上榜。所以近來，自然多咗人用AI，不少文章都甚至預測，好快就會到，AI 傾偈機得閒見你了，幫你斷診，醫生只係技術維修員嘅新時代。
因此，最近一篇研究頗值得留意。去到真嘅睇病，AI係唔係已經去到神醫水平？或者至少適合幫你慳錢慳時，診病施藥？
研究人員請1298隨機分組志願者用AI機(例如Command R+, Llama 3, or GPT-4o)，或憑已有知識或上網自己尋找一些醫療問題答案。
結果發覺詢問者往往未能提供足夠資訊畀AI機來分析。
但整個來講，AI機所提供嘅答案，無論診斷或治療建議，水平都時高時低於自己上網或憑自己知識判斷。換言之目前AI機嘅實戰能力仍然低於正式醫生水平。
將來發展如何未知，但至少目前而言，有乜唔妥，都係睇真人醫生好過虛擬醫生。
"Andrew M. Bean et al, Clinical knowledge in LLMs does not translate to human interactions, arXiv (2025). DOI: 10.48550/arxiv.2504.18919"
關於作者：黃震遐醫生
黃震遐醫生係腦神經科醫生、香港大學校友及粵文作者，長年以廣東話深入淺出講解腦神經、認知障礙、藥物安全同健康研究，推廣市民用母語接觸可靠醫學知識。
作者理念：「上醫治未病，中醫治欲病，下醫治已病。」
原文來源：黃震遐醫生 Facebook 原文（May 10, 2025）
本文經作者授權由 Konghub 整理轉載，保留粵文原意及醫學文獻資料。
醫療聲明：醫學資訊只供公眾教育，唔代替個人診斷或治療建議；如有症狀或用藥疑問，請向合資格醫護人員查詢。
