你記性有冇問題？
年紀大咗，耐唔耐都會有朋友話自己記性差咗。但係佢哋行得走得食得，講話都好人一個，又邊度似有事？睇醫生，驗記憶、認知都話冇事。
咁係唔係庸人自擾？自己嚇自己？
近年來，醫學界慢慢發覺，原來未必。呢啲朋友可能真係啱。只係醫生同神經心理學家之前缺乏適當測試工具，所以測唔到問題。
長期以來，醫學界只知道有認知障礙症初期，短期記憶就會受影響，病友呢頭講完，嗰頭又忘記。一個問題可能連續問完又問。到咗後期就可能唔單止啱啱食完飯又埋怨點解冇畀佢食飯，連長期記憶都受損，連仔女都認唔到。
近年來，醫學界始知道，原來重有一種失憶，患者即時及短期記憶都冇事，但係過咗幾日或幾星期就會記唔起。英文叫accelerated long-term forgetting，暫時未見有中文對應名稱。因為並非長期記憶加速遺失，而只係近期記憶有事，我而今就暫且幫佢起名叫近期記憶遺失症。當然，如果有人近期記憶遺失，佢長期記憶日後亦唔會儲藏有呢段記憶。
腦癎症病友其實好多時都會話自己記性差。近來發覺幾乎一半顳葉腦癎病友都有近期記憶遺失症，證明佢哋的確患有記憶障礙。但除咗佢哋，有啲表面上健康長者亦可以測得到近期記憶遺失症。因此，引起懷疑，長者有呢個問題係唔係代表腦有問題？
英國研究人員啱啱報導近期記憶遺失症患者多有主觀記性衰退，以及大腦海馬區加速萎縮。腦掃描顯示大腦積累比較多澱粉樣蛋白，近期記憶遺失亦比較嚴重。研究人員因此認為近期記憶遺失極能係阿兹海默型認知障礙症嘅早期症狀。
因此，如果上年紀嘅親友覺得自己記性差咗，不止應該睇醫生，而且即使短期記憶正常，認知亦冇問題，都應該要求醫生或神經心理學家做專門測試，查清楚有冇近期記憶遺失。目前，測試方法未有共識，一般醫生或心理學家亦未必熟悉。所以必須同佢哋講清楚始得。
點解要咁追究？因為阿兹海默型認知障礙症應該愈早發覺愈早醫療愈好。而今已經有β-分泌酶1抑制劑，可以阻止澱粉樣蛋白沉澱積累，但臨床試驗都失敗，因為受試者用藥時已經積累好多澱粉樣蛋白，難以回天。如果可以喺屬於高危又未多病理變化時就醫，可能會奏效。
隨咗咁，重有咩可以做？有研究發現瞓得好同瞓晏覺都減少腦癎症病友嘅近期記憶遺失症，對佢哋記性有助。長者亦不妨試吓。
"Mameniškienė R, Puteikis K, Jasionis A, Jatužis D. A Review of Accelerated Long-Term Forgetting in Epilepsy. Brain Sci. 2020 Dec 7;10(12):945. doi: 10.3390/brainsci10120945"
"Ohno M. Accelerated long-term forgetting: A sensitive paradigm for detecting subtle cognitive impairment and evaluating BACE1 inhibitor efficacy in preclinical Alzheimer's disease. Front Dement. 2023 Apr 18;2:1161875. doi: 10.3389/frdem.2023."
"Lu K, Baker J, Nicholas JM, et al Associations between accelerated forgetting, amyloid deposition and brain atrophy in older adults. Brain. 2025 Apr 3;148(4):1302-1315. doi: 10.1093/brain/awae316."
關於作者：黃震遐醫生
黃震遐醫生係腦神經科醫生、香港大學校友及粵文作者，長年以廣東話深入淺出講解腦神經、認知障礙、藥物安全同健康研究，推廣市民用母語接觸可靠醫學知識。
作者理念：「上醫治未病，中醫治欲病，下醫治已病。」
原文來源：黃震遐醫生 Facebook 原文（May 16, 2025）
本文經作者授權由 Konghub 整理轉載，保留粵文原意及醫學文獻資料。
醫療聲明：醫學資訊只供公眾教育，唔代替個人診斷或治療建議；如有症狀或用藥疑問，請向合資格醫護人員查詢。
