前個禮拜有朋友話擔心自己會踏入認知障礙症，因為耐唔耐都會記唔到啲嘢。年紀大咗，即使未有資格自稱為長者，有時都會有咁嘅擔憂。正想寫文討論，啱好見到有位美國同行Richard Restak寫咗本書講點可以強化大家嘅腦，覺得佢幾個觀點同提議都值得分享。
佢認為人老並非等於記憶一定會衰退。
不少“唔記得”，其實都只係集中力問題。
例如，你同幾個人一齊傾偈，之後唔記得其中一位初遇嘅朋友姓咩名咩，其實只係因為你當時唔專注留意，因此，大腦冇儲藏到呢段記憶。
Restak話大家都要對科技有戒心。成日靠手機，來記地方、事、同人，咁你就唔使用腦來留意同記得。今時今日，對記憶嘅最大危脅係來自科技帶來分心。科技設計目的係令人上癮，唔捨得放低。因此大家都會過馬路時，又睇手機，又同朋友傾偈。結果係唔注意當前，唔會將經歷錄成記憶。
其實，不少老師都已經發現，線上教學有問題，因為不少學生唔會專注聽教，唔會集中精神留意課程內容。
Restak建議大家每日生活無時無刻都要鍛煉記憶。例如，去街市買嘢，先寫低，再記住。到咗店舖，先靠記憶買，之後囉睇張紙或手機，執吓有冇漏。如果有揸車，就靠自己記憶搵路。有研究發現，成日都靠車上導航系統嘅人，記憶比其他人衰退快好多。
記憶其實可以分三種，短暫記憶，運行記憶，及長久記憶。年歲大咗，通常係前兩種轉差。短暫記憶似係草稿，經歷某事之後，我哋暫時會留住記憶，然後剪裁留返部分儲藏為長久記憶。而運行記憶就係做任何事時，腦裏面要使用嘅記憶。隨著歲月增加，一般人短暫記憶，同運行記憶儲藏容量會減少，保留時間亦會縮短。
香港同台灣好多長者服務中心都會鼓勵打麻雀，認為對記憶有助。打麻雀好明就係靠運行記憶。但雀友太熟手，我覺得往往機械式反應出牌，未必真正仔細參考運行記憶，考慮清楚是否適當，因此對記憶幫助可能有限。
Restak亦認同捉棋同玩橋牌，都會對記憶好。 但佢認為唔夠，因此建議大家畀運行記憶做更辛苦嘅鍛煉：佢最鍾意嘅係“20個問題”，搵個朋友諗一個人，一件事，或一樣嘢。然後你最多只可以靠問20個問題，來估佢諗乜。因為玩呢個遊戲時，你要靠記住及分析所獲答案來估最終答案。
佢另外推薦嘅記憶運動係寫低一連串名(譬如運動員、作家等等)，之後，掉轉次序寫低這批名，再按照字母(中文可以按照中文字母點橫豎撇……)寫。大家亦不妨試下用地鐵站名、店名、醫院名，電影名……。
另外，Restak鼓勵大家睇多啲小說，因為睇小說，你亦係要記住內容，從頭到尾，主角做緊咩。
總之，記憶要長青不老，都係要似肌肉一樣，要不斷做運動！
關於作者：黃震遐醫生
黃震遐醫生係腦神經科醫生、香港大學校友及粵文作者，長年以廣東話深入淺出講解腦神經、認知障礙、藥物安全同健康研究，推廣市民用母語接觸可靠醫學知識。
作者理念：「上醫治未病，中醫治欲病，下醫治已病。」
原文來源與授權
本文經黃震遐醫生授權，由 Konghub 整理及轉載。查看 Facebook 原帖。
醫療免責聲明
本文只供健康教育及一般參考，唔構成個人醫療診斷或治療建議。如有症狀或用藥疑問，請向合資格醫護人員查詢。
