平仔五個月大時，有日發起燒時突然雙眼反白，四肢抽搐成二十分鐘。隔日，佢又抽多一次。檢查不見異常，醫生診斷為兒童常見嘅熱性抽搐。但跟住落去，佢就有冇發燒，都會不時失去知覺，四肢抽搐。家人有時見到抽搐係先由右手開始。雖然開咗好幾隻藥一齊服用，都一直控制唔到。
醫生後來經過基因檢查，確診佢係嬰兒嚴重肌陣性腦癇症（Dravet綜合症）。由於基因異常，腦內電活動失去平衡，抑制不正常電流嘅能力因而減弱，導致腦癎症出現。
一直至今，Dravet綜合症都屬於腦癎症難治頑疾，無法根治。由腦癎而來嘅腦部受損，認知發育阻礙，亦都無法阻擋。最多只可以希望減輕減少發作。
基因異變所造成嘅病，脊髓性肌肉萎縮症、地中海貧血症，現今都可以靠補返基因來治療。但有啲基因異變疾病就唔得。
大家身上嘅基因都係一對對嘅。如果一對基因中，有隻壞咗，另一隻通常會頂上，令人若無其事。但有的基因就並非如此。只靠孤單一隻，就頂唔住，會出現問題。Dravet綜合症嘅SCN1A就屬呢類「單套缺失性基因」。
「單套缺失性基因」特點係所負責生產嘅蛋白質，太少唔得，太多亦唔得，要啱啱咁多，唔多唔少，囉可以安然無事。
因此，地中海貧血症，脊髓性肌肉萎縮症都可以靠補返基因來治療。但如果用同樣治療方法，靠補返正常基因來應付Dravet綜合症就唔得。因為只要計錯數，補過龍，就會產生嚴重副作用，甚至死亡。另一方面，補返基因治療法，通常要用隻病毒幫手運送基因入身體。但單套缺失性基因往往體積太大，病毒載運唔到。
還好，最近似乎出現突破。
現今，總共有六間公司試探緊朝兩種方向來解決基因單套缺失問題。基因發揮作用，係將製造蛋白質單方，轉錄到信使RNA，由佢啟動製成蛋白質工程。既然問題出自碩果僅存嘅健全基因，獨木難支，一種方向係加強僅存基因嘅轉錄能力，令隻基因可以下傳信息畀更多信使RNA，從而生產出更多有需要嘅蛋白質。另外一個方向就係針對信使RNA。改善轉錄及轉錄後裁剪效率，或提高信使RNA生產蛋白質效能。
改善轉錄後裁剪效率嘅藥STK-001要經由脊椎腔注射，初步試驗結果表示Dravet綜合症病友腦癎可以大幅減少。
人體上有至少三千隻基因屬於獨木難支，可以呈現基因單套缺失症。香港都有不少患者嘅馬凡綜合症(俗稱蜘蛛人症)，部分就係因為單套缺失而出現。部分自閉症、思覺失調、過度活躍症、肥胖、先天性心臟病、先天性肝病都係。所以雖然單套缺失症疾病多數屬於罕見或少見病，患者總數加加埋埋起來就並非少。換言之，上述研究方向除咗平仔之類病友，亦都可以幫好多其他病友帶來生機。
“平仔”為借用以下醫學報告中病友例子來解釋Dravet綜合症症狀，所起假名。Mak CM, Chan KY, Yau EK, Chen SP, Siu WK, Law CY, Lam CW, Chan AY. Genetic diagnosis of severe myoclonic epilepsy of infancy (Dravet syndrome) with SCN1A mutations in the Hong Kong Chinese patients. Hong Kong Med J. 2011Dec;17(6):500-2. PMID: 22147323)
主要參考
Elie Dolgin Hope for haploinsufficiency diseases knowledge magazine 2023.4.13
Myers KA, Scheffer IE. Precision Medicine Approaches for Infantile-Onset Developmental and Epileptic Encephalopathies. Annu Rev Pharmacol Toxicol. 2022 Jan 6;62:641-662.
doi: 10.1146/annurev-pharmtox-052120-084449.
關於作者：黃震遐醫生
黃震遐醫生係腦神經科醫生、香港大學校友及粵文作者，長年以廣東話深入淺出講解腦神經、認知障礙、藥物安全同健康研究，推廣市民用母語接觸可靠醫學知識。
作者理念：「上醫治未病，中醫治欲病，下醫治已病。」
原文來源與授權
本文經黃震遐醫生授權，由 Konghub 整理及轉載。查看 Facebook 原帖。
醫療免責聲明
本文只供健康教育及一般參考，唔構成個人醫療診斷或治療建議。如有症狀或用藥疑問，請向合資格醫護人員查詢。