人一呱呱落地，就開始向年老邁進。隨年歲愈來愈增高，細胞內運作亦愈來愈失靈：基因異變增加，染色體甩尾，縮短。
身體各器官嘅蛋白質結構都由基因嘅DNA 決定。細胞先要用一隻酶素，RNA聚合酶，將DNA轉錄成一份做合成蛋白質嘅印模，信使RNA (或稱mRNA)。然後，信使RNA再合成蛋白質。印模如果錯咗，蛋白自然會變質。
科學家最近發現，無論係人、大鼠、小鼠、果蠅、或線蟲都一樣，隨住年歲增長，RNA聚合酶轉錄DNA時就會加速，而產生錯誤，造成印模錯誤。走得快，唔係好世界，而係壞世界。
之前，已經知道節食，減少飲食熱量可以拖慢老化。而節食，減少飲食熱量亦會令RNA聚合酶轉錄速度放慢。科學家進一步發現有啲果蠅及線蟲會有異型基因，令RNA聚合酶轉錄速度放慢。呢種果蠅同線蟲都比一般果蠅同線蟲長壽。
另一方面，細胞為咗慳空間，會將DNA繞住條條組織蛋白，以便放置。老化嘅細胞 內，呢種核小體數量減少，似乎係RNA聚合酶加速嘅原因之一。因為加多啲組織蛋白，RNA聚合酶就會減速。果蠅亦會因此而增長壽命。
目前已經知道生老病死，不少病都同轉錄失誤相關。如果能夠製造出針對轉錄過程速度嘅治療方法，減少轉錄失誤，我哋或者唔單係可以延長壽命，更可能令人類晚年更為健康，更少被病魔折磨。
Debès, C., Papadakis, A., Grönke, S. et al. Ageing-associated changes in transcriptional elongation influence longevity. Nature (2023).
關於作者：黃震遐醫生
黃震遐醫生係腦神經科醫生、香港大學校友及粵文作者，長年以廣東話深入淺出講解腦神經、認知障礙、藥物安全同健康研究，推廣市民用母語接觸可靠醫學知識。
作者理念：「上醫治未病，中醫治欲病，下醫治已病。」
原文來源與授權
本文經黃震遐醫生授權，由 Konghub 整理及轉載。查看 Facebook 原帖。
醫療免責聲明
本文只供健康教育及一般參考，唔構成個人醫療診斷或治療建議。如有症狀或用藥疑問，請向合資格醫護人員查詢。