近年多咗香港人選擇移民澳洲，其中一定要考入籍試。但有讀者就向澳洲廣東話傳媒揭發指，考題示例答案出錯率高達四分之一，而且錯咗好多基本嘢。澳洲政府就話係翻譯機構搞錯，會更新返，但就唔肯為去年入籍考試唔合格嘅港台考生調整分數。

入籍試隨機抽出20道嘅選擇題，內容以《澳洲公民身份：我們的共同紐帶》小冊子為藍本。考生要答啱回答20題中嘅15題。喺舊年11月，澳洲加入有關澳洲價值觀嘅5題，要答啱晒先可以通過考試。但澳洲SBS電視台廣東話組就揭發，新版小冊子20題考題示例錯咗足足5題。

內政部回覆澳洲SBS電視台廣東話組查詢時表示，該部門使用由國家筆譯同口譯認可機構NAATI認證嘅筆譯服務，以翻譯入籍試資料以供出版，由兩位NAATI認證嘅翻譯員檢查，出版前再校對，但就冇解釋點解錯。收到廣東話組查詢後，內政部再次要求翻譯人員再次審核翻譯資料，並確認翻譯嘅準確性。

根據內政部資料，自澳洲價值觀加入考核後，即2020年11月15日至今年1月16日期間，共有245名香港人及199名台灣人參加入籍試，平均合格率為97%。就是次模擬試題出錯，內政部表示不會調整不合格考生的分數。