兼有兩者功能嘅星形膠質細胞

作者：黃震遐醫生

（標題為編者所加）

進展唔係逐日累積，而往往係跳躍式，一係水盡鵝飛*，一係就驚雷頻頻。前兩個禮拜，冇乜值得提嘅消息傳出。

沉日就出現一宗非常重要報告。

大家都知道腦內有兩大類細胞，神經細胞，同膠質細胞。大家亦都明白不同位置嘅神經細胞就有不同功能及性質，不同位置及性質神經細胞出現病變，會造成不同嘅病。但膠質細胞中最常見嘅星形膠質細胞就一直以來，被認為只係後勤服務員工，千篇一律，毋須太仔細識別。即使知道同不同病有關，都並不值得太重視。

直至前兩三年始開始有文章指出其實星形膠質細胞亦係各區有各特色，可能同不同病相關。之前，一組日本及美國研究人員已經指出雖然不同區域內星形膠質細胞共同享有850隻基因，卻有三份之一基因分歧，暫時意義未明。

今次，由瑞士Andrea Volterra,帶領下嘅國際研究人員報告首次證實，其實隨咗神經細胞，一般星形膠質細胞之外，重有一種兼有兩者功能嘅星形膠質細胞。

所以已前隱藏，係因為呢種星形膠質細胞只係位於海馬區，而且數目不多，要搵出非靠先前新穎工具不得。

此類星形膠質細胞同神經細胞一樣，具有傳遞信息能力，可以釋放谷氨酸。經過釋放谷氨酸，此類星形膠質細胞可以影響神經細胞功能：加強鞏固記憶，阻止腦癇電波擴散，以及影響柏金森病等基底病變症狀。

因此，針對此類細胞嘅研究可能會為我哋帶來新嘅治療方案來醫治腦癇症、柏金森病、及認知障礙及其他記憶問題。

而隨咗谷氨酸之外，日後亦有可能會發現星形膠質細胞可以釋放其他化學品，產生不同效果。更或許一些我哋目前認為係神經細胞疾病嘅，日後會發覺星形膠質細胞始係主要問題來源。

*坊間誤稱：水靜河飛

Endo F, Kasai A, Soto JS, Yu X, Qu Z, Hashimoto H, Gradinaru V, Kawaguchi R,

Khakh BS. Molecular basis of astrocyte diversity and morphology across the CNS

in health and disease. Science. 2022 Nov 4;378(6619):eadc9020. doi:

10.1126/science.adc9020.

de Ceglia, R., Ledonne, A., Litvin, D.G. et al. Specialized astrocytes mediate glutamatergic gliotransmission in the CNS. Nature (2023).

Posted in 時論