作者：黃震遐醫生
（標題為編者所加）
注射幹細胞對柏金森病有冇用？
目前來講，幹細胞證實有效而且可以安全使用嘅病得幾種：
最常見嘅係骨髓幹細胞移植，或血液幹細胞來替代血癌、淋巴瘤患者原有骨髓細胞。嚴重燒傷病友可以用實驗室內以幹細胞生長出嘅皮膚。2017年以來，歐洲亦暫准使用幹細胞來醫治眼角膜損傷。
但啱啱發覺有個香港柏金森病友組織網頁上舊年居然出現宣傳幹細胞治療， 並有人宣稱治療結果良好。因此，覺得必需澄清，以免病友受騙。
首先，一般人口中嘅幹細胞只係總名稱，事實上有好幾種而唔係一種幹細胞。
考慮用喺柏金森病治療方面嘅幹細胞至少有四種：胚胎幹細胞、神經幹細胞、間質幹細胞、以及多能幹細胞。
每種都有利有弊。獲取胚胎幹細胞、神經幹細胞都有倫理問題。胚胎幹細胞、神經幹細胞、同多能幹細胞更可以變出腫瘤。有位患有小腦共濟失調兒童2001-2004年時連續多次喺俄羅斯接受咗經脊腔注射及小腦移植嘅神經幹細胞治療。2006年時，因為頭痛，被發現小腦旁及脊髓多處出現混合性神經腫瘤，基因分析證明都並非由病友自己身體所長出，而係來自注入嘅外源幹細胞。
柏金森病友大腦內分泌多巴胺細胞逐步消失。用胚胎幹細胞、神經幹細胞、同多能幹細胞目的係補替返失去嘅細胞。但係除咗副作用問題，幹細胞入咗腦，要能夠長久生存，識得變成會分泌多巴胺嘅細胞，而唔係任何細胞，更加要同大腦其他神經細胞連繫起來，產生作用。所以，從1981討論及開始進行研究同試驗至今，四十幾年，二千多篇論文後，只有四項正式登記試驗完成，而發表結果。仍然無任何證據出得到來用胚胎幹細胞、神經幹細胞、同多能幹細胞醫治得到柏金森病。
目前現有對典型或非典型柏金森病已登記臨床試驗全部都屬於早期小規模試探階段試驗，說明大家都未能清楚如何可以有效而安全使用幹細胞。
而由於其中幹細胞可以引發腫瘤問題，現今研究大部分集中喺相對比較安全嘅間質幹細胞。間質幹細胞作用就唔係生成腦細胞，而係經過分泌激素，修補大腦。但如何令注入嘅間質幹細胞可以分泌出對柏金森病友有用嘅激素而進行修補，仍然屬於研究中難題，未有結論。
率先用間質幹細胞做臨床試驗，直至舊年十月時，所知道嘅有12項已經正式登記。其中，只有一項進行觀察中，五項仍在收取病友中，一項稱為特别邀請收取實驗對象中，四項已停頓而有冇哂下文，一項全無消息。
目前以幹細胞治療為名而掘金嘅醫院及診所，遍布五大州，超過400 個網站。通常都係透過網同社交網絡媒體進行宣傳，強調可能益處，而略過風險。所謂證據來自個人宣稱，而並非正式科學期刊論文。
如果係都要試，當然可以。但係必須記得自己係做緊白老鼠。正規臨床試驗係唔收錢嘅。因為究竟病友係要冒風險。如果唔係正式登記嘅臨床試驗，所用嘅幹細胞是否安全，注射程序是否安全，都係必須考慮。不怕犧牲，其勇可嘉。但畀人搵笨，畀錢受難，就太可憐了。
由於大陸同馬來西亞都有醫院同診所聲稱可以用幹細胞醫治柏金森病，所以特登提供幾篇大陸研究者論文，以免受批評話唔知亞洲發展如何。
Zeng X, Qin H. Stem Cell Transplantation for Parkinson’s Disease: Current Challenges and Perspectives. Aging Dis. 2022 Dec 1;13(6):1652-1663. doi: 10.14336/AD.2022.0312. PMID: 36465172; PMCID: PMC9662280.
Liu S-f, Li L-y, Zhuang J-l, Li M-m, Ye L-c, Chen X-r, Lin S and Chen C-n(2022) Update on the application of mesenchymal stem cell-derived exosomes in the treatment of Parkinson’s disease: A systematic review. Front. Neurol. 13:950715.doi: 10.3389/fneur.2022.950715
Marsili L, Sharma J, Outeiro TF, Colosimo C. Stem Cell Therapies in Movement Disorders: Lessons from Clinical Trials. Biomedicines. 2023 Feb 9;11(2):505. doi: 10.3390/biomedicines11020505. PMID: 36831041; PMCID: PMC9953050.