大陸經常有血荒，醫院需要為病人輸血，而血庫不夠。捐血偏低，只有1.2%率，同社群態度相關。早幾日，山東研究人員發表咗篇調查報告。舊年時，研究訪問咗三個城市18-34歲捐血居民，六成男性，六成大學畢業。受訪者中，三份一為公司或政府集體捐血運動而來，因此，並非自發性捐血。山東目前捐血並非似香港、台灣咁屬完全無償行為，而係會回報以驗血、證書證明用咗九十分鐘行程時間，二十文*人民幣，以及需要輸血時，有優先。
調查目的係想知道，除咗金錢，邊一類鼓勵可以有效增加捐血行為。
結果發現加錢到60文人民幣對69%受訪捐血者起鼓勵作用。54%想要全身檢查而唔剩係驗血。而捐血可以令家人受惠，成為輸血優先者，更受8成受訪捐血者支持。
以前亦有研究發現捐血會唔會令家人受惠，對大陸捐血意願影響比較大。
由此可見，即是係已經有較好教育及年輕嘅大陸人，仍然相當在意捐血對自己或家人有咩好處。
相對於大陸嘅1.2%捐血率，其他華人居多地方完全無償捐血制下，星加坡1.8%，香港3%，台灣7.5%。東亞隣近嘅另兩個地區，南韓同日本6%。
愛國教育所教嘅應該並非只係忠君保國而已，而應該係老我老以及人之老，幼我幼以及人之幼，關心，愛護同一社群嘅人，甚至全人類。如果不能愛同國之人如自己及家人，愛國思想只會係虛有其表，或者淪為封建嘅忠君思想而已。根據世界衛生組織，全球發達地區無償捐血率中位數係3.15%。香港𢺳𢺳緊接近。大陸低於中上收入國家嘅1.6%。台灣則屬全球之冠，可謂華人之光。
如果考慮埋器官登記捐贈率，香港、大陸相約3.9%，而台灣則12.3%。 大家文化習俗相似，因此差别並不能以此作解釋。睇來，喺關心及愛護同胞嘅教育方面，大陸、香港都應該向台灣虛心學習。
*粵語金錢單位香港慣寫成蚊，其實本字係古代金錢單位“文”。文係多聲字，可以讀同“蚊”音
Wang Y, Zhai P, Jiang S, Li C, Li S. Blood Donors’ Preferences Toward Incentives for Donation in China. JAMA Netw Open. 2023 Jun 1;6(6):e2318320. doi:10.1001/jamanetworkopen.2023.18320.
關於作者：黃震遐醫生
黃震遐醫生係腦神經科醫生、香港大學校友及粵文作者，長年以廣東話深入淺出講解腦神經、認知障礙、藥物安全同健康研究，推廣市民用母語接觸可靠醫學知識。
作者理念：「上醫治未病，中醫治欲病，下醫治已病。」
原文來源與授權
本文經黃震遐醫生授權，由 Konghub 整理及轉載。查看 Facebook 原帖。
醫療免責聲明
本文只供健康教育及一般參考，唔構成個人醫療診斷或治療建議。如有症狀或用藥疑問，請向合資格醫護人員查詢。
