脊髓受損癱瘓病友可望行返！

今日大新聞自然係一位頸脊髓十年前受損，癱瘓要坐輪椅嘅病友居然行返。

脊髓受嚴重損傷後，大腦命令下達唔到手腳神經。病友因此會全身或下半身癱瘓。一直以來都會要喺輪椅上度餘生。

今次呢位38歲病友十年前因為單車意外，頸部第五、六節脊髓受損。雖然未全部截斷，仍然需要長期坐輪椅，無法自行。三年前，佢喺背脊髓硬膜外裝咗刺激器之後，可以推助步車架喺家中行走。但係仍然覺得起步難，而且只可以平地行走，行唔上斜坡，提高唔到隻腳來踩過阻擋物，更遑論上落樓梯。

呢次，研究人員喺佢頭部裝咗左右兩塊取錄器，用來收取佢大腦控制腿部運動嘅電波活動。透過記錄器同脊髓刺激器嘅聯繫，大腦迶動腳嘅信息就可以發動脊髓刺激器來指揮脊髓神經運動細胞，下達命令畀腿腳神經。

完成四十次復康訓練後，病友可以用枴杖行路，踩過阻擋物，及上樓梯。七個月來經驗一直良好，可以上落汽車，都朋友去酒吧企住飲酒傾偈。近日更可以唔開大腦取錄器都行到。更重要係，佢現今覺得自己行得正常，而唔係似最初只用脊髓刺激器時，似機器人咁僵硬。

當然，目前信息所依靠嘅裝置仍然太大，需要縮小減輕。收錄及刺激程序亦重有進步空間。但相信毋須太多年後，好多截癱或全癱，要坐輪椅過餘生嘅病友都可以享受返近正常生活。

Lorach, H., Galvez, A., Spagnolo, V. et al. Walking naturally after spinal cord injury using a brain–spine interface. Nature (2023).

關於作者：黃震遐醫生

黃震遐醫生係腦神經科醫生、香港大學校友及粵文作者，長年以廣東話深入淺出講解腦神經、認知障礙、藥物安全同健康研究，推廣市民用母語接觸可靠醫學知識。

作者理念：「上醫治未病，中醫治欲病，下醫治已病。」

本文經黃震遐醫生授權，由 Konghub 整理及轉載。查看 Facebook 原帖。

本文只供健康教育及一般參考，唔構成個人醫療診斷或治療建議。如有症狀或用藥疑問，請向合資格醫護人員查詢。