創傷或缺氧導致腦部損傷昏迷後，有啲病友聽到聲或被接觸後，會好似醒咗，擘大隻眼。但對親朋外界卻毫無反應，不言不語，一聲一舉一動都冇。過去，英文名叫vegetative state。中文就叫植物人。
但呢個名稱無論中外文，潛意識都暗示病友再唔係人，只係植物。粵語尤其會令人聯想起閙人蠢嘅話，成棵菜*。年幼仔女，好多時候都難以接受病友狀態，甚至拒絕探訪，相信或多或少同名稱有關。
所以，好幾年前，外文就已經改成unresponsive wakefulness syndrome。但無論大陸、台灣、港澳中文就一路都未轉，主要係因為諗唔到適當名稱。直譯成冇反應但又醒，實在太長太唚*。
病友係醒嘅，但未得全部正常喚醒。因為檢查亦會發覺同瞓醒相關嘅腦活動仍然低過正常。而更複雜同認知活動相關嘅大腦各區就更加似落咗麻醉藥後。外文名詞強調兩點，病友似係醒咗，唔再係昏迷不醒。但對外界卻冇反應。
我最近想起，如果用“醒後停應狀態”會否適合？ 俗用就可以再縮為“停應狀態”。
粵語話，“打電話都唔應，你應我啦”。「應」字呢種用法係古文。《禮記主言》有段講曾子起曰：「敢問：何謂『主言』？」孔子不應。曾子懼，肅然摳衣下席曰：「弟子知其不孫也，得夫子之間也難，是以敢問也。」孔子不應，曾子懼，退負序而立。
現今北方方言都唔會咁單獨用「應」一字，意義只保留喺“反應、回應、應答、應承”，等雙字詞內。
如果用「應」字構詞，停止反應就毫無問題可以濃縮為「停應」。停應似停電，並非表示永久不會復原。冇反應更並非全部唔知唔思。有研究發現聽到自己姓名時，三份一“醒後停應狀態”病友腦電波同聽其他姓名時不同，表示仍有自我意識。
希望大家畀啲意見。當然，如果另外有更好建議代替“植物人”，就更加歡迎。
總之，希望可以幫到病友家人親朋，畀佢哋一個比較好聽嘅名稱，唔再二次傷害佢哋。
*一棵菜，廣東人常寫成一樖菜，認為棵只有fo音，冇po音。但樖本意並非量詞。北音kē亦係fo1。無論樖所屬柯形聲字族或棵形聲字族，聲母，韻母都可以轉成讀po。我現今用棵，因為比較少筆畫，樖字亦比較生僻。
表示囉唆長氣嘅「唚」字亦有人寫成譖，或噆。譖，噆都另有意思。唚本有說話意思。
Ferré F, Heine L, Naboulsi E, Gobert F, Beaudoin-Gobert M, Dailler F,
Buffières W, Corneyllie A, Sarton B, Riu B, Luauté J, Silva S, Perrin F. Self-processing in coma, unresponsive wakefulness syndrome and minimally conscious state. Front Hum Neurosci. 2023 Apr 12;17:1145253. doi:10.3389/fnhum.2023.1145253.
關於作者：黃震遐醫生
黃震遐醫生係腦神經科醫生、香港大學校友及粵文作者，長年以廣東話深入淺出講解腦神經、認知障礙、藥物安全同健康研究，推廣市民用母語接觸可靠醫學知識。
作者理念：「上醫治未病，中醫治欲病，下醫治已病。」
原文來源與授權
本文經黃震遐醫生授權，由 Konghub 整理及轉載。查看 Facebook 原帖。
醫療免責聲明
本文只供健康教育及一般參考，唔構成個人醫療診斷或治療建議。如有症狀或用藥疑問，請向合資格醫護人員查詢。
